Hugaður brúgumi

Sögu skal nú segja stutta sem að ég hef nýsskeð frétt, eflaust þekkiði þennan gutta það er alveg rétt. Þannig er að maður nokkur hefur verið að koma sér uppað altarinu í 31 ár með konu sem hann hefur elskað allt sítt líf. Hengilsháttur hans var svo mikill að konan nennti ekki að bíða og fór sjálf upp að altarinu bara með öðrum manni og hrúgaði með honum niður tveimur börnum. Ekki var þetta hjónband ætlað löngum lífdaga og svo fór að þau slitu samvistum eftir að nokkuð áberandi var orðið að eldur var farinn að krauma í glæðum gamla sambandsins með hengilsháttslega manninum, kraumaði sá eldur oft og tíðum fram yfir háttatíma venjulegs fólks, segja hnýsnir. Mömmu hengilsháttslega mannsins fannst þetta ekki góður ráðahagur að láta þennan opna eld loga svona og allra síst þegar fólk var gengið til náða. Svo mamman skipaði hengilsháttslega manninum að hann skyldi finna sér konu við sitt hæfi og stöðu og hætta að hugsa um þessa drós sem blótaði, sturtaði í sig gini og reykti camel eins og kolakynntur togari. Manngarmurinn fór því að ráðum mömmu um sveitir landsins og fann að lokum ósjallaða unglingsstúlku sem var undirleit rjóð og heit og í rökkri kom fram vilja mömmu sinnar sem gaf af sér tvö börn. En svo er það að ekki lifir neisti nema brenni og súrefni hafi og því kulnaði eldurinn í þessum arni en líf færðist í gamla Camel arinninn aftur enda sagt að fýsibelgurinn hafi verið notaður reglulega til að halda loganum góðum og var þetta allt hið vandræðalegasta fyrir alla aðila málsins. Fór svo að að rjóða sveitarstúlkan sem á þessum tíma var rauðeygð af tárum alla daga, gafst upp á að keppa við hin reynda ginsvelg og sleit sambandi sínu við hinn hengilsháttslega mann. Nokkru síðar lést hún. Eftir háttatímasambandið hélt síðan áfram og hengilháttlegamanninum hefur vaxið fiskur um hrygg og ákvað fyrir nokkru að fara niður á hnéin og biðja viðhaldsins. Mamma hans var eitthvað stúrin yfir þessu öllu saman og ákvað að hún ætlaði ekki að koma til þessarar víxluathafnar sem verður að halda í borgardómi í Windsorhreppi. Mömmustrákurinn er nú að verða sextugur og hefur loksins skorið upp herör gegn vilja mömmu sinnar og ákveiðið að eiga æskuástina sína. Konunglegir rýnarar og fræðamenn leita endalaust að leiðum í skinnbókum breska lögþingsins til að blessa eða forbjóða ráðahaginn og einnig að meta hvort Kalli megi eða geti orðið kóngur klár.

Snjór, IKEA og Hallbjörn Hjartarson

Í gærkveldi hófst snjókoma hér í Englandi, ekki með neinum látum heldur með þessari venjulegu snjóskyrpu. Þessi grámi sem varla festir setur allt úr skorðum og fólk ferst úr kuldum og flutningaleiðir fólks ganga úr skorðum svo að rútur og flutningabílar liggja afvelta meðfram þjóðvegakerfum landsins. Við drifum okkur af stað í morgun ég og krakkarnir og klæddumst íslenskum snjóklæðnaði og settum stefnuna á garðinn til að fjölga um einn í fjölskyldunni. Þar var klónaður einn snjókarl sem átti held ég eins og hálftíma ævi en þá datt kvikindið um koll og Örvari fannst þar sem þessi ræfill gæti ekki lengur staðið undir sjálfum sér bara best að jafna hann alveg út enda var þarna komið fyrirtaks efni til að hnoða saman í minni kúlur og láta dynja á nágrönunum. Þetta er því svona slabbtíð núna og frekar kalt. Við unnum okkur það einnig til frægðar í gær að fara í Circus hér í bænum en árlega kemur hingað svoleiðis fyrirbæri sem kennir sig við "Uncel Sam American Circus" Þetta er alveg einstakt þar sem öllum vörumerkjum Ameríku er flaggað svo sem fánanum og amerískir trukkar skreyttir með ameriska erninum, glimmeraðir kúrekahattar og alkyns drasl í fánalitunum og besta er kynnirinn; hann er eins og Hallbjörn Hjartarson. Veður fram og aftur blaðrar í míkrafón linnulaust með þvoglulegri hásri röddu svo að einungis skilst lítilræði af því sem hann er að reyna að koma til skila. Sykrað popp og indjánar innanum kúreka að leika listir í tvo tíma. Fínasta afþreying og krakkarnir fíluðu þetta í botn. Kántrýbæjarstemming, Ég sæji þennan fyrir mér á Skagaströnd. Jæja það er komið að því að fara hita upp IKEA kjötbollur. Svona er þetta orðið. Matarborðið, stólarnir, matarstellið hnífpörin og glösin sem við drekkum úr eru úr IKEA svo nú er meira að segja Kjötbollurnar og sultan úr IKEA. Annars var hörmung hér um daginn þegar nýtt IKEA setup var opnað í London og til að trekkja að var sett upp ægilega gott opnunartilboð á einhverjum sófa sem vont er að sitja í. Fjöldi manns tróðst undir og svo gekk þetta svo langt að fólk var stungið á hol því færri fengu sófa en vildu. Þetta er hægt að gera myndrænt" maður stendur í röð við kassan með tilboðssófa undir hendinni og kemur þá ekki einhver og rekur mann á hol hrifsar af mér sófann og tekur stæðið mitt í röðinni.??????????" Mér varð bara hugsað til hennar tengdamúttu sem enn leitar dyrum og dyngjum að rétta sófanum til að prýða stássstofu sína. Aðalatriðið er að það sé gott að leggja sig í honum. Það er gæðamerki á sófum. Jæja sænskar kjötbollur eru að sjóða uppúr svo ég verða að fara og hræra í pottinum með IKEA sleifinni.........

Konunglegt bónorð og endurkoma

Það þykir orðið mörgum nóg um hvað ég hef tekið langt frí frá skrifum hér á bloggið. Sem kemur ekki beint til af leti heldur önnum í öðrum hlutum og frekar mikilli fjarveru að heiman í Janúar og Febrúar mánuðum. Já það er ekki eins og maður hafi verið á sólarstönd að sleikja notalegheitin ó nei. Það er ekki þverfótað hér í Englandsskíri fyrir áhyggjum innlendra þessa dagana yfir því að frilla Kalla til tugaára verði nú næsta drottning þeirra. Ég hef hreinlega séð fólk fá hroll þegar það hugsar til þeirra staðreyndar. Að vísu fann einhver sérfróður rykfallinn skjalaskinnsrýnari það út að best væri að kalla hana Her Royal Highness Princess of Contress, sem hljómar eins og hún sé með símalínuþjónustu 109,90 á mínútuna svo ekki sé meira sagt. Innst inni eru Bretar enn sárir yfir skilnaði Kalla og Díönnu og Camilla er og verður álitin hjónadjöfull á meðan hún tórir og jafnvel lengur. Karlanginn hann Karl varð náttúrulega að biðja hennar þar sem hann gat ekki lengur verið svona einmannakarlskröggstýpa enda löngu búinn að slá öll fyrri met frægra manna yfir að vera heima hjá mömmu, hver var sá frægastur er líklega Jesús Kristur sem fór ekki að heiman fyrr en eftir þrítugt skilst mér. Engu að síður hefur fjölmiðlagengið verið í essinu sínu síðastliðna daga með alskyns athugsemdir og aðfinnslur yfir því að þessir eldgömlu unglingar skuli vera að kela þetta einhverstaðar í hinum mörgu skúmaskotum hallarinnar. Einn húmoristinn sagði að hann vildi ekki sjá hana sem drottningu því hann gæti ekki hugsað sér að sleikja frímerkið sem andlit hennar væri á. Það verður örugglega hægt að fylgjast mikið með með þessu á næstu árum, en Kalli getur verið viss um að hann hefur hana Camillu útaf fyrir sig........Það er síðan ætlunin að fara að fjölga pistlum meira og sólin er að hækka á lofti og veður að hlýna svo það lítur út fyrir hlýtt vor. En hvað veit ég svosem um veðurfar frekar en konunglegt kvennafar........