Óskhyggja og árangur

Mig hefur alltaf langað að vera góður í einhverju, bara einhverju. Það hefur mér ekki auðnast ennþá, allavega fylla afrekaskrár mínar ekki margar bókahillur. Ég sá fljótt að hástökk, langstökk og hlaup yrðu mér seint til frægðar svo ég reyndi að taka stefnuna á eitthvað hæggengnara ss golf og heitapottasetur. Golfið hef ég verið viðriðinn nú í ein 4 ár án frægðar eða árangurs. Ég hef prófað flestar golfkúlutegundir án þess að þær lendi margar á brautum og hef ég ekki séð að ein tegund skari framúr annari hvað varðar beint flug. Ég réði mér því kennara til að líta á þetta vandamál kúlanna nú á vordögum fyrir sumarhretið sem nú gegnur yfir. Vorum við báðir hinir bröttustu við fyrstu kynni um að hægt væri að leysa vandamál mitt á golfsviðinu. Nú gamlir hundar hafa verið tregir til náms hingað til og eru enn held ég. Jú hann Jón hafði á mér tröllatrú og þóttist sjá bata merki og jafnvel árangur á þeim tíma sem hann gaf sér til að snúa mér á réttar brautir. Sálfræði stríð hans við mig bar árangur og ég var fullur sjálfstraust og ánægður með mig. Líkt og Jörundur hundadagakonungur hélt ég af stað á laugardaginn síðasta í golfmót sem haldið var á Akranesi við mikinn vindstyrk og vosbúð. Enn og aftur hófu kúlurnar sinn einleik og flúðu völlinn leituðu hælis í tjörnum og skurðum sem mikið er af þarna á Akranesvellinum. Ég var að niðurlotum kominn, bældur, hrakinn, kaldur og forskalaður þegar ég eftir margar tíma labb og leit náði dyrum golfskálans. Í nokkrar mínútur var ég að ná áttum og fingrunum af hurðarhúninum, og gerði mér óljósa grein fyrir því að fullt af fólki var komið þarna í sama ástandi. En þarna á Skaganum hlaut ég mín fyrstu verðlaun í golfi. Það var nefnilega dregið úr skorkortum og þá vann ég snakkpoka. Ég mun því halda áfram að keppa í golfi, en mikið helvíti er kalt á Íslandi í dag.

Rúðupiss

Senn líður að sumarfríum landsmanna og míns líka. Aldrei þessu vant þá er þegar búið að ákvarða hvert á að fara í hluta að fríinu þetta sumarið og hafa frændur okkar og múslima vinir orðið fyrir valinu. Þar á ég ættingja og vini sem við höfum hugsað okkur að kíkja við hjá. Til að komast um dönsku slétturnar og Himmelbjerget (101 m) höfum við tryggt okkur bílaleigubíl og munum því vera eitthvað á vegunum dönsku. Ég var orðin nokkuð ánægður með þessa ráðagerð þangað til áðan að ég las um raunverulegt rúðupiss. Jú um vegi Danmerkur fara margir og þar með talið vörubílstjórar sem eru flestir í spreng bæði með blöðruna og einnig í tímaspreng. Allur heimurinn krefst meiri hraða og ekki geta vörubílstjórar farið hraðar og því var eina ráðið að stoppa styttra. Til að létta á sér segir í greininni að þeir pissi í flöskur, fernur, jógúrtdósir eða annað handhægt með hæfilega víðu gati og spari sér þar með dýrmætan tíma. Eitt leyst vandamál býr venjulega til annað og svo er einnig hér, Ekki er áhugi hjá þeim að rúnta um með hanskahólfið fullt af pissi í léttmjólkurfernum eða jógúrtdósum og því hafa þeir fleygt þessu útum gluggann á ferð. Það vekur mér því ákveðinn ugg að eiga eftir að mæta þúsundum flutningabíla í Danmörku á 10 dögum ef hver ferna inniheldur um 450 millilítra.

Ljósberi

Í gærkvöldi horfði ég á mann játa syndir sínar fyrir alþjóð. Ég var ekkert sérstaklega sannfærður um að maðurinn sakmmaðist sín þe. hann hafði ótrúlega góðan hæfileika til að hylma yfir algjöra iðrun. Auðvitað, því stóru bræður hans í fjölskylduni hans voru búnir að fara í gegnum þetta með honum heilan sunnudag og segja "Eyþór! Skamm Skamm" og stóra bláa höndin sló létt á litlu bláu höndina en síðan leiddust þær út. Og þetta eru skilaboðin til kjósenda: að það sé í lagi að ætla að aka til Selfoss drukkinn?. Að það sé í lagi að keyra á ljósastaur drukkinn.? Það sem er merkilegast við þetta allt er að Þegar yfir fólki er einhver dýrðar eða framboðsljómi þá er bara hægt að réttlæta alla hluti. Það get ég sagt ykkur að þetta mun ekki draga úr fylgi Sjálfstæðismanna á Árborgasvæðinu, Sumir eru kannski ekki ánægðir með þetta en þeir munu ekki yfirgefa flokkinn. Hvernig geta menn, ráðamenn, reynt að fegra málið? Glæpur er glæpur hvort sem keyrt er á ljósastaur eða Björgvin Arnaldsson, svo einfalt er það. Hafi menn ekki dómgreind til að keyra ekki fullir; þá hafa þeir varla dómgreind til að fara með umboð almennings.